Shefja e Epidemiologjisë në Institutin e Shëndetit Publik, Eugena Tomini, ka deklaruar se piku i COVID-19 mund të arrihet në mesin e muajit prill.
Në një lidhje me emisionin “Open” në Top Channel, ajo u shpreh se pa u ulur kurba, nuk mund të fillojmë daljen nga karantina.
Tomini zbuloi më tej për të gjithë qytetarët të cilët vijojnë të qëndrojnë të izoluar, se masat e ndërmarra nga qeveria, do vazhdojnë edhe përtej dy javëshit të parë të prillit. Shefja e Epidemiologjisë shtoi më tej se pas pikut të infeksioneve nga koronavirusi, pritet ulja lineare.
“Sipas projeksioneve statistikore, prilli do të ketë vazhdimësinë e pikut dhe trendin e hasjes së rezultateve pozitive në vend. Mesi i prillit do jetë piku për këtë sezon të infeksionit COVID në vend.
Masat do vazhdojnë përtej dy javëshit të parë të prillit. Mbas pikut pritet ulja lineare. Nëse kjo ulje do të jetë graduale duke arritur në bishtin e kësaj epidemie, do të jemi shumë fatlum”, u shpreh Eugena Tomini.
