Ministri i Jashtëm i Greqisë, Nikos Dendias shprehu mbështetjen e vendit të tij për Kosovën, në lidhje me liberalizimin e vizave. Deklarata e Dendias, u bë ditën e sotme gjatë vizitës së tij zyrtare në Prishtinë, ku zhvilloi dhe një konferencë të përbashkët me homologen kosovare, Donika Gërvalla.
Dendias u shpeh se Greqia do të mbështesë Kosovën për sundimin e ligjit dhe luftën kundër krimit e korrupsionit. Edhe pse Greqia nuk e njeh pavarësinë e Kosovës, Dendias tha se zyra në Athinë, vijon të merret me çështjet ekonomike midis dy vendeve.
Ndër të tjera, Dendias u shpreh se kjo zyrë do të shërbejë për përmirësimin e marrëdhnieve dypalëshe.
Nikos Dendias: “Ne jemi në favor të liberalizimit të vizave pasi vendi juaj i ka përmbushur të gjitha kushtet. Nga Greqia, keni mbështetjen për sundimin e ligjit, luftën kundër krimit e korrupsionit. Ne jemi këtu nëse keni nevojë për ndihmën tonë në këtë drejtim. Kemi zyrtarë grekë në kuadër të misionit të EULEX-it që punojnë në këtë çështje. Ne pavarësisht qëndrimit tonë neutral dhe statusit të Kosovës, kemi një zyrë në Athinë e cila që nga viti 2019 vazhdon të jetë atje dhe të merret me çështje ekonomike dhe ne shpresojmë që kjo zyrë të jetë ndihmë edhe më shumë në marrëdhëniet tona Greqi-Kosovë”.
