Është rritur numri i viktimave si pasojë e koronavirusit në Kosovë.
Autoritetet zyrtare njoftojnë se në Kosovë kanë humbur jetën në total 9 persona, që prej fillimit të pandemisë.
Qendra Klinike Universitare e Kosovës (QKUK) bëri me dije se së fundmi ka ndërruar jetë një 69-vjeçar nga Suhareka, i infektuar me koronavirus.
I sëmuri ishte në mjekim intensiv në Klinikën Infektive të QKUK-së.
Aktualisht në Klinikën Infektive bëhet e ditur se janë duke u trajtuar 53 raste pozitive me koronavirus, 39 prej të cilave janë në gjendje të stabilizuar shëndetësore, ndërkohë që 12 raste janë në trajtim me oksigjenoterapi dhe përkujdesje intensive.
Tre pacientë mbesin në gjendje kritike, thuhet në njoftimin e QKUK-së.
Që nga shfaqja e rastit të parë në Kosovë, më 13 mars, 387 persona kanë dalë pozitivë në testin për koronavirus, ndërsa 69 kanë pasur sukses në shërim.
