Shqipëria po përballet me një valë infektimi, që nuk po njeh stopim. Shifrat kanë kaluar pragun e pritshëm, duke nxjerrë në pah problematikat nga ana e qytetarëve që nuk zbatojnë rregullat e higjenës dhe distancimit social.
Pas një bllokimi prej muajsh, shqiptarët zbatuan me përpikmëri ditët e para rregullat e parashtruara nga autoritetet shëndetësore, për të përfunduar më tej në këtë gjendje. Por shqetësimi shtohet edhe më shumë, ndërsa studimet tregojnë se 95 përqind e popullatës shqiptare nuk ka krijuar antitrupa dhe është e rrezikuar.
Imunologu Genc Sulçebe zbuloi në ‘A2’ rezultatet e një studimi paraprak, që është duke u bërë në lidhje me numrin e personave të infektuar në vendin tonë me COVID-19.
“Popullata shqiptare pati një bllokim të theksuar, dhe për këtë arsye nuk është e imunizuar ndaj këtij virusi. Ndërkohë, në vende të tjera të Evropës, apo në Amerikë, po shkohet drejt 10 përqindëshit të popullatës së imunizuar, në popullatën tonë kjo shifër është shumë e ulët.
Në një studim paraprak, pilot, që ne po bëjmë me dhuruesit e gjakut, kemi parë që kjo shifër është shumë e ulët, nën 5 përqind.
Mbi 95 përqind e popullatës shqiptare, nuk ka krijuar antitrupa dhe është e rrezikuar, jo vetëm të përhapë virusin, por edhe të sëmuret dhe të ketë komplikacionet e parashikuara, që për fat janë të rralla. Por që mund të rezultojnë të rrezikshme për jetën e individëve”, u shpreh Sulçebe.
