Koronavirusi ka goditur edhe Komisionin Europian.
Presidentja e Komisionit Europian, Ursula von der Leyen ka bërë me dije se një nga punonjësit e stafit të Komisionit ka ndërruar jetë si pasojë e COVID-19.
Përmes një postimi në Twitter ajo njofton se i ndjeri ka qenë pjesë e Departamentit të Kërkimit dhe Inovacionit dhe punonte pranë Agjencisë Ekzekutive të Këshillit të Kërkimit Europian (ERCEA).
“Jam jashtëzakonisht e trishtuar të njoftoj për vdekjen dje të një anëtari të përkushtuar të stafit të Komisionit, i cili ishte sëmurë me COVID-19. Unë i paraqes ngushëllimet e mia të përzemërta familjes së tij, dhe mendimet e mia janë gjithashtu me kolegët e tij nga ERCEA dhe Drejtorisë së Përgjithshme të Kërkimit dhe Inovacionit”, shkruan von der Leyen.
