Përdorimi i fjalorit aspak etik, është kthyer tashmë në një normalitet në Kuvendin shqiptar. Ofezat e debatet e forta, janë pjesë e përditshmërisë gjatë seancave në Parlament. Sot, si dhe në shumë raste të tjera më herët, i është tërhequr vëmendja deputetit Ralf Gjoni, për shkak të një sjellje aspak të hijshme ndaj ministres Belinda Balluku.
Teksa Ministrja e Infrastrukturës dhe Energjisë, Belinda Balluku po fliste mbi projektligjin për sektorin minerar, deputeti Gjoni ndërhyri nga vendi, duke iu drejtuar me “ej, ej”.
Gjoni kërkonte të dinte se cila kompani e sponsorizon këtë projektligj. Kjo sjellje nuk kaloi pa një koment nga Balluku, e cila ia ktheu me ironi.
“Një djalë me edukatë, pse duhet të flasë me ej, mi, etj, etj. Mos më ndërprit, je djalë me kulturë”.
“Ej, ej, ktë çe ke ktë ej ej. Pyetjet retorike skaduan në fushatë elektorale. Këtë me sponsorizime e dini ju më mirë, pasi keni funksionuar me anë të sponsorizimeve. Edhe njëherë, ne nuk punojmë me sponsorizime i dashur Ralf.
Ne i sjellim në Komision, kemi pasur të gjithë kohën për të diskutuar për këtë projektligj, sot do të votohet. Kështu që pyetjet retorike për fushatë elektorale kanë përfunduar”, tha më tej ajo.
