Kryesore

“Çfarë i thotë truri Ramës”/ Tensionet e forta te TK, Çipi: Artistët që po shantazhohen

               Publikuar në : 17:12 - 24/07/19 S.N

Prej orëve të para të mëngjesit policia ka rrethuar Teatrin Kombëtar. Kjo në mbështetje të punonjësve që do të bëjnë zbrazjen e materialeve nga godina. Por, kjo gjë ka tensionuar situatën, duke sjellë zemërimin e qytetarëve dhe artistëve. Atyre iu janë bashkuar edhe ish-deputetë të Partisë Demokratike. Qytetarët e pranishëm para hyrjes së Teatrit Kombëtar hapën dritaret për të hyrë brenda teatrit. Por, janë përballur me rezistencën e uniformave blu, ku nuk kanë munguar shtyrjet dhe përplasje.

Si pasojë e të cilave, një protestues ka rrëshqitur dhe është rrëzuar në pishinën e boshatisur ndërmjet Teatrit Kombëtar dhe Teatrit Eksperimental.

Pas disa tentativave për konflikt disa prej tyre kanë mundur të hyjnë brenda godinës. Mes tyre artistët dhe zyrtarët të PD-së, të cilët janë ngujuar në godinë. Dhe shprehen se nuk do lejojnë zbrazjen dhe shembjen e Teatrit.

Aktori Romir Zall në një prononcim për Tirana Today, shprehet se projekti për prishjen e godinës së TK-së është i jashtëligjshëm.

“Ky projekt nuk mund të vazhdohet e as të finalizohet. Kjo për sa kohë nuk ka bazë ligjore apo vendime në letër për këtë punë. Ky teatër është mbyllur pas asnjë lloj shkrese. E kërkojmë dhe nuk ekziston asgjëkund, gjithçka është me fjalë goje.

Është si të thuash që këta po bëjnë një shtet privat. Ministrja e Kulturës është ajo e radhës, thjesht i kanë dhënë një pozicion që duhet të rrijë aty. Duke mos thënë as po e as jo, as mish e as peshk.

Por, nuk është çështja te ministrja. Është te qasja nga kryeministri, për të cilin nuk e di çfarë i thotë truri dhe do ta çojë deri në fund. Qoftë me apo pa ligj, me apo pa rregulla, me rrëmujë, me përplasje. Ai do të bëjë të veten, kurse ne do të bëjmë tonën.”

Ndërkohë, regjisori Kastriot Çipi thotë se edhe pse nuk dalin publikisht, pjesa më e madhe e artistëve janë shantazhuar me vendin e punës. Edhe nëse bëhet fjalë për ata aktorë që punojnë në media, të cilat sipas regjisorit janë të lidhura me qeverinë.

“Nën zë, jo publikisht të gjithë pohojnë se janë shantazhuar me vendin e punës këtu në teatër. Më pas janë edhe ata të cilët janë zhantazhuar me vendin e punës që i kanë në media të lidhura me qeverinë.

Kjo është një çështje krimi kombëtar, Shqipëria nuk duhet të ketë simbole kombëtare, nuk duhet të ketë histori apo kujtesë. Nëse ky projekt do të finalizohet e Rama do të abuzojë, do të jetë shpallja përfundimtare e diktaturës në Shqipëri. Sepse bashkë me teatrin, bie edhe demokracia dhe identiteti kombëtar.

Do të jemi një komb i pushtuar. Rama urren kombin shqiptarë dhe është i gatshëm të zhdukë çdo simbol tonin. Dhe nuk është për tu habitur që është i gatshëm të negociojë kufijtë e Kosovës, në favor të Serbisë.”/ TIRANA TODAY

Kthehu
WhatsApp Denonco ne TT