Nga: Mentor Kikia
-Nuk do të ketë Kuvend në datën 11 dhjetor- thonë Basha dhe mbështetësit e tij.
-Nuk do të ketë Kuvend në datën 18 dhjetor- thonë Berisha dhe mbështetësit e tij.
-Berisha e akuzon Bashën, për aleancë me Ramën në dëm të opozitës.
-Basha e akuzon Berishën se po bashkëpunon me Ramën për shkatërrimin e PD-së.
Në fakt Ramës, nuk i duhet të bëjë asgjë, pasi vetë Basha dhe Berisha, janë duke “bashkëpunuar” për ti vënë kazmën PD-së. Ai që do të marrë selinë në fund, mund ta bëjë edhe motel.
Secili pretendon se Kongresi i tij do të bëjë partinë më të fortë. Por pas dy Kongreseve, ku secili do të pretendojë se ka shumicën e delegatëve, PD nuk do të jetë më e fortë, përkundrazi.
Ka vetëm një mundësi që PD të mbetet gjallë. Një proces i vërtetë zgjedhor, demokratik, me një fushatë reale për të shpalosur idetë dhe projektet. Të jeni të sigurtë se nuk do të fitojë as Berisha e as Basha. Berisha e ka mbyllur ciklin me kohë. Basha e tregoi se nuk shkon dot më larg.
Do të thoni me vrap: Po kush do të fitojë, hë kush?
Ka njerëz të aftë e të zotë, që këta nuk kanë lënë të ngrejnë kokë.
Nëse nuk realizohet kjo, PD do të prodhojë tri grupime. Njëri me kryetar Berishën, njëri me kryetar Bashën e një tjetër pa kryetar, por njerëz të dëshpëruar që nuk do të duan t’ia dëgjojnë më emrin as Berishës e as Bashës e as vetë PD-së.
