Interi mori një fitore të rëndësishme një natë më parë në “San Siro” përballë Sampdorias. Ka qenë një javë e turbullt për zikaltërit dhe kryefjala ka qenë “çështja Icardi”. Vendimi i drejtuesve të Interit për t’i hequr atij shiritin e kapitenit, është shndërruar në një temë dite në futbollin italian dhe jo vetëm.
Është folur jo pak se për sulmuesin argjentinas ka qenë Juventusi që është interesuar verën e kaluar dhe për më tepër, e ka në konsideratë për këtë sezon.
Por sot për herë të parë për çështjen, foli edhe presidenti i klubit zikaltër, Steven Zhang, i cili theksoi se Interi nuk do të shesë kurrë Icardin te Juventusi.
“Nuk do të shesim kurrë Icardin te Juventusi. Besoj se Mauro do të mbetet te ne dhe do të rritet bashkë me skuadrën. Synimi ynë është që të ndihmojmë të rritet Interi, por edhe futbolli italian e ai botëror, ndaj jemi të interesuar që të mbajmë futbollistët tanë më të mirë. Shumë shpejt do të ketë edhe një ofertë rinovimi për Mauro Icardin”, deklaroi Zhang.
