Rama u shpreh dje se asnjë çështje nuk është e pazgjidhshme, dhe nuk do të ketë asnjë pushtim të Shqipërisë nga Greqia nëpërmjet detit. E ndërsa sot, në një deklaratë për mediat, Rama ka zbuluar se çfarë kërkon Shqipëria në gjykatën e Hagës për çështjen e detit me Greqinë. Ai vuri pikat mbi ‘i’, ndërsa theksoi se çështjen e detit e ka hapur Shqipëria dhe jo Greqia. Kryeministri shtoi më tej se Shqipëria kërkon një marrëveshje të drejtë!
“Çështjen e detit e ka hapur Shqipëria dhe jo Greqia, për këtë të fundit ka qenë e mbyllur për marrëveshjen e bërë me Saliun, Lulin dhe Ilir Metën. Nuk ka pasur asnjë pretendim më shumë sesa aq sa mori nga ajo marrëveshje.
Atë e hapa unë me PS kur ishim në opozitë dhe aleatë, në Gjykatën Kushtetuese ka shkuar PS, 9-0 gjykata e rrëzoi me kërkesë si paditës të PS dhe çështja është rihapur falë këmbënguljes, durimit dhe vullnetit tonë në komunikimin me palën tjetër.
Qartësisht Greqia ka zgjedhur që të vërë në dispozicion të zgjidhjes së të gjitha çështjet të gjithë vullnetin e tij të mirë. Më në fund, pala greke ra dakord me ne, se me qeverinë e mëparshme nuk kishim rënë dakord, në duart e një gjykate që i ka të gjitha ekspertizën që të japë drejtësi të drejtë për këtë problem.
Një zgjidhje ideale, që në bazë të protokolleve dhe do të përgatitemi siç e kërkon procedura për të arritur në një zgjidhje të drejtë. Ne kërkojmë një marrëveshje të drejtë, marrëveshja e mëparshme ka qenë e padrejtë.
Të tjerat janë skandale mendore, shprehje të ligësisë që furnizon injorancën me qëllim në funksion vetëm të pushtetit të ca mediokërve, që duan me çdo kusht plaçkë në Shqipëri”, tha Rama.
Dje, ministri i Jashtëm grek, Nikos Dendias, theksoi se zgjidhja e çështjes së detit është në dobi të të dyja vendeve, duke cituar se është gjetur dakordësia mes Shqipërisë dhe Greqisë për t’iu drejtuar Gjykatës së Hagës, dhe për t’i dhënë zgjidhje një herë e mirë.
