Autoritetet kineze kanë njoftuar se është shënuar viktima e katërt nga virusi misterioz. Mësohet se tashmë autoritetet kineze kanë ngritur alarmin, pasi kanë zbuluar se virusi i ri mund të transmetohet nga njeriu në njeri. Më herët, autoritetet kishin besimin se ky virus misterioz mund përhapej vetëm përmes kafshëve të sëmura.
Viktima e fundit e shënuar në Kinë është një burrë 89 vjeçar nga qyteti Wuhan, aty ku ka origjinën dhe virusi. Ai shfaqi të njëjtat shenja, pneumoni dhe pastaj ndërroi jetë.
Më shumë se 200 raste të infektimit janë raportuar në qytetet kryesore të Kinës, përfshirë Pekinin dhe Shangain.
Në një deklaratë tjetër, Komisioni Komunal i Shëndetësisë në Wuhan njoftoi se së paku 15 punëtorë shëndetësorë janë infektuar me këtë virus, ndërsa njëri prej tyre ndodhet në gjendje kritike. Të gjithë personat e infektuar po mbahen të izoluar gjatë trajtimit nëpër spitale.
Virusi tashmë është përhapur edhe jashtë Kinës. Dy raste janë shënuar në Tajlandë, një në Japoni dhe një tjetër në Korenë Jugore, shkruan “BBC.
