28-vjeçari Vilson Tafçiu u ekzekutua me armë zjarri mbrëmjen e djeshme në rrugën “Teodor Keko”, në zonën e njohur si “Astiri” në kryeqytet. I riu që përdorte dy mbiemra, ishte me origjinë nga Dibra. Ai kishte jetuar më herët në Belgjikë dhe në Francë, nga ku ishte deportuar një vit më parë.
Në muajin mars të 2018, ai ishte dënuar me 1 vit burg në Francë, por kishte qëndruar vetëm 8 muaj në paraburgim, e më pas ishte deportuar drejt Shqipërisë. Vilson Tafçiu Ndoka kishte ardhur në Tiranë për të varrosur gjyshen e tij, e cila kishte ndërruar jetë para pak ditësh.
Ende nuk ka asnjë të arrestuar për ngjarjen e rëndë, por dëshmitarët kanë deklaruar se i riu u qëllua me armë zjarri nga një person i pa maskuar, i gjatë dhe me mjekër. Dy pistat ku po heton policia janë e shkuara kriminale e të riut dhe dyshohet se ngjarja mund të ketë ndodhur edhe për shkaqe xhelozie.