Bllokimi i vizës nga Ambasada e Shteteve të Bashkuara të Amerikës për Petrit Vasilin ka alarmuar Lëvizjen Socialiste për Integrim. Një veprim i tillë i ndërmarrë nga amerikanët, tregon qartë se lista e zezë e SHBA po rritet dhe pjesë e saj janë bërë edhe përfaqësues të lartë të partisë së presidentit Ilir Meta.
Po ashtu, bllokimi i vizës për ish-deputetin Vasili është edhe një mesazh se me ngritjen e Strukturës së Posaçme Antikorrupsion, shumë emra do të japin llogari para drejtësisë. Një gjë e tillë është kuptuar shumë qartë nga LSI, e cila ditën e djeshme ka shtuar dozën e sulmeve në adresë të ndërkombëtarëve.
Ka qenë ish-deputeti i Lëvizjes Socialiste për Integrimi, Petrit Vasili, i cili përmes një statusi në rrjetet sociale ka akuzuar aleatët e Shqipërisë, duke i bërë përgjegjës kryesor për krizën politike që ka përfshirë vend. Në këtë kontekst, Vasili deklaroi se deklaratat e ndërkombëtarëve krijuan këtë gjendje, ndërsa veçoi kështu faktin se Shqipërisë nuk do t’i hapen negociatat, referuar deklaratave të Komisionerit Johanes Hahn. Sipas tij, Rama duhet të largohet në kushtet kur nuk do të hapen negociatat me Bashkimin Europian. “Maqedonia OK, Shqipëria jo, Hahn dhe Tsipras flasin vetëm për Maqedoninë. Qeveria dhe kryeministri sakrifikojnë hapjen e negociatave për të shtyrë disa ditë në karriget e thyera e tyre. Kriza e tmerrshme politike në Shqipëri, ku shkaku i vetëm është kryeministri që kërkon zgjidhje dhe largimi i tij është vetëm hapi i parë. Shqipëria po paguan padrejtësisht për shkak të instalimit të një qeverisjeje moniste, të kriminalizuar dhe të korruptuar. Tani evropianët po flasin vetëm për Maqedoninë e Veriut, po Shqipëria ku mbeti? Më parë Shqipëria ishte shumë më afër hapjes së negociatave se sa Maqedonia, po sot pse mbeti pas saj ? Pse nuk venë gishtin në plagë ndërkombëtarët? A mjaftojnë deklaratat klishe të tyre, të cilat na prunë në këtë ditë”, deklaroi ish-deputeti të LSI, Petrit Vasilit.
Kriza politike, reagon Hahn
Pavarësisht sulmeve të ish-deputeti të LSI, Petrit Vasilit, Komisioneri për Zgjerimin në Bashkimin Europian, Johanes Hahn ka folur ditën e djeshme për situatën politike në vend. Duke folur gjatë konferencës “Perspektivat e reja të Maqedonisë së Veriut”, organizuar nga Forumi Ekonomik i Vjenës, Hahn i ka dërguar një masazh opozitës shqiptare, duke bërë krahasimin me Maqedoninë e Veriut. Zyrtari i lartë i Brukselit theksoi se vendi i pakicës është në Parlament dhe se palët politike duhet të shohin interesin e vendit.
“Krahasuar me vende të tjera, situata në Maqedoninë e Veriut është shumë më e mire. Opozita është opozitë, por konstruktive. Opozita është në Parlament. Është duke marrë pjesë në jetën politike për një demokraci të maturuar. Ne po punojmë të dyja palët për perspektivën europiane të Maqedonisë së Veriut, po punojmë fort për të bindur disa partnerë paksa të hezituar për të na dhënë dritën jeshile të fillojmë përgatitjet për çeljen e negociatave shumë shpejt. Jam i bindur që do të ndodhë përpara verës dhe jam i bindur që në fund të vitit mund të hapim kapitujt e parë”, deklaroi Komisioneri për Zgjerimin në Bashkimin Europian, Johanes Hahn./Gazeta SOT
