Nga Anxhela Ferra
Ditën e djeshme opozita bllokoi 5 akset kryesore kombëtare për një orë. Ndryshe nga protestat e kaluara ku protestuesit kanë qëndruar para institucioneve si Kryeministria apo Parlamenti, kësaj radhe ata u ndanë në disa qytete. Protestat u shoqëruan me djegien e gomave, si edhe të disa banerave, tubi dhe rrjeta të vendosura tek ish rrethrrotullimi “Shqiponja” që tregonin investimin që duhej të bëhej në Unazën e Re.
Edhe pse ditën e djeshme nuk pati incidente, një moment në hyrje të Tiranës gjendja u tensionua midis protestuesve dhe një shoferi. Një skenë kjo e përsëritur edhe në raste të tjera, ku midis shoferëve që kërkojnë të kalojnë dhe protestuesve që bëjnë rezistencë për t’i ndaluar, krijohen konfrontime. Ndërkohë disa qytetarë thonë për Tirana Today se kjo formë protestimi i duket absurde dhe se po i pengojnë në përditshmërinë e tyre.
“Kjo pjesa e paralizimit të vendit është e rëndë për qytetarët. Qytetarët që duan të kalojnë kanë të drejtë, por edhe protestuesit kanë shumë të drejtë që kërkojnë të protestojnë. E gjitha duhet të zgjidhet me tolerancë.”
“Ato janë gabime nga ana e protestuesve, pasi nuk bëhet lufta me qytetarët. Por, ajo duhet bërë brenda në Parlament me parlamentarët. Nuk kanë pse bllokojnë rrugët sepse kjo gjë do të vazhdojë përherë. Marrin popullin të dalë atje kot, mua më duket shumë absurde.”
“Unë kam qenë 27 vite në Turqi dhe atje kanë bërë protesta, por që të pengojnë njerëzit rrugët nuk lejohet. Edhe po çuditem sesi e kam lënë unë Shqipërinë në ’92-shin, e tani e kam gjetur më keq. Më vjen kaq keq për këtë gjendje, saqë para një jave kur ndezën atë zjarrin në rrugë kam bërtitur. Sidomos kur i dëgjoja të thoshin ‘Shqipëria është e jona’, jo Shqipëria është e të gjithëve. Ndaj ata nuk mund të bëjnë çfarë duan. Sepse edhe thyerja e një xhami ndikon në ekonomi. E shihni sa para është Turqia?!
“Mirë nuk është të bllokohen rrugët, sepse njerëzit kanë punë dhe duan të shkojnë sa më shpejt në një vend të caktuar. Sherri vetëm të këqija ka, duhet të jenë tolerantë. Ata duhet ta kuptojnë vetë se sa e rëndësishme është qetësia në vend. Ata që janë në punë apo kanë aktivitete ku duhet të lëvizin i shqetësojnë shumë këto bllokimet e rrugëve.”
Por, një qytetare shprehet për Tirana Today se kjo është e vetmja mënyrë për të bërë zërin e tyre të dëgjueshëm dhe për të sjellë ndryshim në qeverisje. Edhe nëse kjo do të thotë bllokimin e rrugëve.
“Mirë më duket se bllokohen rrugët, sepse jemi të varfër. Unë kam dalë gjithmonë në protesta. Edhe për ata qytetarët që duan të kalojnë na vjen keq, por nuk kemi çfarë të bëjmë. Me këtë qeveri që kemi ne, nuk shkohet gjëkundi, ka vetëm varfëri dhe korrupsion.”/ TIRANA TODAY
