Në një kohë ku të gjithë kanë nevojë për mbështetje dhe ndihmë sado të vogël nga njëri-tjetri, këngëtarë dhe artistë të ndryshëm nga e gjithë bota kanë vendosur të mbledhin donacione që do t’ju shkojnë në ndihmë familjeve të prekura nga Covid-19.
Periudha e Krishtlindjeve dhe Vitit të Ri, i ka kthyer këto personazhe në Babagjyshin që do sjellë sadopak shpresë për këto familje.
E fundit që ka bërë të ditur këtë vendim përmes faqes së saj në web, ka qenë diva e muzikës pop Beyonce.
Ajo ka njoftuar se ka derdhur 500 mijë dollarë përmes fondacionit të saj të bamirësisë BeyGood.
Kjo shumë do shkojë në mbështetje të atyre që gjatë periudhës së pandemisë, kanë qenë pa punë dhe që rrezikojnë dëbimin nga shtëpia pas skadencës së moratoriumit federal, gjë që sjell bllokime të hipotekave dhe probleme me qiratë.
Por kjo nuk ka qenë e vetmja ndihmë që fondacioni i saj ka dhënë gjatë pandemisë, përfshirë një fond Small Business Impact, që ju vinte në ndihmë bizneseve.
