Besa Shahini la postin e ministres së Arsimit, për tu zëvendësuar me Evis Kushin. Kryetari i grupit parlamentar të PS, Tualant Balla, në një intervistë për “News24” tha se Besa Shahini u largua, pasi përmbylli me sukses të gjithë detyrën e saj si ministre.
Ai nuk ka pranuar që të komentonte nëse Besa Shahini është larguar apo shkarkuar. Po kështu shtoi se me rëndësi mbetet që Besa të vazhdojë të ruajë një komunikim të përditshëm me Evisin, për të bërë dorëzimin e stafetave. Vendin e Shahinit, që la Ministrinë e Arsimit në ditën e parë të shkollës, e ka marrë deputetja socialiste Evis Kushi.
Pjesë nga intervista
U shkarkua Besa Shahini apo dha dorëheqjen?
Ajo që është e rëndësishme është se cikli i reformave në Ministrinë e Arsimit do të vazhdojnë, implementimi i tyre do të vazhdojë me një hov të ri me ministren e re. Ajo që është e rëndësishme për familjet shqiptare, është se unë dua të garantoj se kaluam shumë mirë testin e djeshëm, atë të fillimit të shkollës. Zonja Kushi ka një rol të rëndësishëm në ditën e parë të fillimit të vitit akademik.
A mban përgjegjësi Rama për këto largime?
Rama gjithmonë ka ditur që të krijojë një shpirt ekipi brenda grupit të ministrave. Unë mendoj që kjo pak rëndësi ka. E rëndësishme është që Besa do të vazhdojë të ruajë një komunikim të përditshëm me Evisin, për të bërë dorëzimin e stafetave.
Po për ministren e re, çfarë kriteri u përdor?
Një ministre si Kushi që vjen nga bota akademike, prej 7 vitesh nuk e ka ndërprerë komunikimin dhe gjej rastin që të vlerësoj përzgjedhjen që ka bërë Rama edhe brenda grupit parlamentar. Ky grup përmban personalitete të vlerësuara.
A do të ketë lëvizje të tjera në qeveri?
Padyshim që gjithmonë herë pas herë kur konsiderohet për një ritëm të ri, apo një hov të ri, kryeministri ka vlerësuar të bëjë ndryshime. Unë vlerësoj se në këto sektorë, kemi persona të duhur në vendin e duhur. Nuk është larg momenti kur ne do të marrim besimin për mandatin e tretë dhe në formësimin e qeverise së re 2021-2025 mund të kishte edhe ndonjë ndryshim tjetër. Por kjo vendimmarrje i takon kryeministrit.
A duhet të ketë ndryshime të tjera?
Ne kemi një plan, një program dhe një matricë të vlerësimit të performancës që vlerësohet për 6 muaj për çdo fushë që mbulon.
