Sali Berisha ka vendosur që të sfidojë SHBA-në, duke hapur qendrën e votimit para derës së Ambasadës Amerikane. Ish-kryeministri Sali Berisha do votojë në qendrën e ngritur pranë Ambasadës së SHBA-së. Sipas informacioneve, mësohet se një qendër është ngritur pranë Ambasadës Amerikane, në lokal Bar Amerika. “Kështu në degën nr. 1 në Tiranë do të votojnë në zyrën e degës. Në degën nr.2 në Tiranë do të votohet në lokalin Bar Amerika pranë Ambasadës Amerikane”, thuhet në njoftimin e grupit organizator.
Kështu ish-kryeministri po sfidon SHBA-në, duke ngritur qendrën ngjitur me selinë diplomatike amerikane, edhe pse tashmë ai është shpallur që nga muaji maj si person “non-grata” nga ana e Departamentit Amerikan të Shtetit.
Pak ditë më parë, Departamenti i Shtetit hodhi poshtë akuzat e bëra nga ish-kryeministri Sali Berisha ndaj ambasadores Yuri Kim. Në përgjigje të pyetjes së “Zërit të Amerikës” sa i takon akuzave të bëra nga ish-kryeministri Sali Berisha ndaj ambasadores Yuri Kim se ajo po sillet si guvernatore në Shqipëri dhe se mbështet kryeministrin Edi Rama, zëdhënësi i Departamentit të Shtetit Ned Price tha se “Uashingtoni është i shqetësuar nga sulmet e pajustifikuara ndaj ambasadores tonë në Tiranë. Këto sulme të shëmtuara nuk përfaqësojnë popullin shqiptar”.
