Ish-kryeministri, Sali Berisha ka akuzuar presidentin e Kosovës, Hashim Thaçin, pasi ai pretendon se është një peng i dosjes së tij të Beogradit.
I ftuar në emisionin “369 gradë”, Berisha tha se Thaçi nuk duhet të merret me çështjen e hapjes së negociatave për Kosovën, por të shkojë në Hagë për t’u pastruar.
Sipas tij, janë 200 anëtarë dhe drejtues të LDK që janë ekzekutuar pas lufte.
“Hashim Thaçi është një peng i dosjes së tij të Beogradit dhe po t’i ketë ngelur qoftë edhe një gram dinjitet nuk merret kurrë me çështjen e negociatave me Kosovën pa shkuar në Hagë, pa u pastruar. Unë nuk di të ketë kryer asnjë krim. Raportin e Dik Martin unë e kam kundërshtuar, por nuk e kanë kundërshtuar ata që ngritën gjykatën, Shtetet e Bashkuara të Amerikës.
Raporti është i bazuar në dosjet e Prokurorit të Beogradit. Janë 200 anëtarë dhe drejtues të LDK të ekzekutuar pas lufte. Janë 200 dhe jo 1, nga drejtues kryesorë, gazetarë e anëtarë të thjeshtë. Këtë e di se kam qenë kryeministër kur është ngritur gjykata. “Argati” mbrapa donte ta anulonte, gjë që nuk bëhet kurrë, prandaj nuk i them unë, i thotë vetes ai që është “argat”, tha Berisha.
