Kryeministri Rama ka qenë sot i pranishëm në Vlorë, ku mori pjesë në një konferencë Ndërkombëtare “Drejt së Ardhmes: Qyteti im, Shtëpia ime”. Kreu i qeverisë kritikoi vlonjatët, ku nëse hedhin mbeturina, në këtë formë përzënë turistët. Në fokus ishte një mjedis më i pastër dhe investimet e ardhshme për të rritur kapacitetet akomoduese të qytetit bregdetar.
“Në një mjedis ku e bukura ka rrezatim, ndryshon raporti i njeriut me tjetrin, i njerëzve me rregullat. Zbatimi i rregullave bëhet shumë më i thjeshtë, njerëzit bëhen më të predispozuar të zbatojnë rregullat. I njerëzve me higjenën dhe pastërtinë aty ku mjedisi është i pastër dhe ku ka rrezatim pozitiv të së bukurës. Janë shumë më të gatshëm të shpenzojnë dhe rritet konsumi dhe vlera e pronës. Flitet për Lungomaren në aspektin estetik dhe kënaqësisë që krijon. Por në fakt përtej asaj që duket në atë zonë kanë ndodhur edhe gjëra që nuk duken, njerëzit që kanë prona atje janë më të pasur sot.
Investimi i ka bërë njerëzit më të pasur. Pasuria e patundshme është rritur në nivele që nuk mund të mendohej kur Lungomare ishte një zonë me gropa e baltë, me dyqane thjeshtë vitrina me lajmërime për shitje por si blinte askush. Sot është krejt tjetër.
Në Kume ku para pak kohe duhej të futeshe me çizme, është çështje pak vitesh ku shtëpitë do jepen me qira për pushuesit, do kenë turistë të huaj.
Zona po del në dritë me investim të konsiderueshëm për investime në nivel Bashkie. Vlora sot po hyn në një fazë, kur nevoja për shtretër dhe akomodim do të rritet në pikën e një krize shumë të madhe. Kush ka dhe do ketë shtretër në Vlorë, do vijojë të rrisë çmimet”, tha ai.
Pas konferencës në Vlorë, gazetarët i drejtuan një pyetje Ramës për Sali Berishën, por ai tha se nuk e njeh.
Gazetarja: Berisha nga Vlora tha…
Rama: Kush është ky? Kush është ky? Ndjesë pastë!
