Kreu i PD-së, Lulzim Basha, mbajti dje një komunikim LIVE, teksa deklaroi se ish-presidenti dhe ish-kryeministri Sali Berisha nuk do të jetë më pjesë e grupit parlamentar të PD-së. Sipas Bashës, ky vendim do të jetë në fuqi deri sa të merret një vendim nga gjykata në Paris, ku Berisha ka paditur sekretarin Antony Blinken. Por Berisha nuk ka qëndruar në heshtje, ndërsa ka reaguar rreth dy orë më vonë.
Ish-kryeministri Berisha ka dalë në dy studio televizive, ndërsa u shpreh se përjashtimi është vendim personal i Bashës dhe i asnjë forumi të partisë. “Basha për interesa apo qëllime të caktuara shpalli një vendim i cili është nul, sepse është vendimi i tij dhe i asnjë forumi të PD-së. Por nuk është ky thelbi, por thelbi është dorëzimi i sovranitetit të PD-së. Ka humbur e tërë shoqëria shqiptare, sepse vetëm një forcë politike sovrane mund të qeverisë vendin, mund të jetë një opozitë e pavarur e interesave opozita”, deklaroi ai.
Ai tha se do bëjë gjithçka për të vendosur sovranitetin e PD-së. “Do krijoj aleancë dhe bashkëpunoj me çdo qytetarë në Shqipëri, që beson se në vend duhet të ketë opozitë sovrane”, u shpreh ai.
I pyetur nëse do të krijojë parti të re, Sali Berisha ripërsëriti se do të bëjë gjithçka me çdo demokrat dhe shqiptar për të vendosur sovranitetin e partisë. “Me veprimin e tij, Basha shkelmoi parimet themelore, PD-në e kanë themeluar zotërinj, studente intelektual, në kulmin e izolimit dhe rrethimit, kanë vendosur parimin e të drejtave njerëzore, sot Lulzim Basha nën presionin të lobimit korruptiv, Rama-Soros, shpall vendim të paligjshëm në historinë e pluralizmit shqiptar. Tani unë besoj se këto që të thashë, një gjë të siguroj së Sali Berisha do bëj gjithçka me çdo demokrat dhe shqiptar për të vendosur sovranitetin e partisë, që Lulzim Basha do të jepte 5 herë dorëheqjen para se të shkelmonte”, tha ai.
