Pak orë para protestës së Berishës në selinë e PD-së, kryedemokrati Basha është parë teksa i është drejtuar zyrës së tij. Kreu i PD-së Lulzim Basha e ka nisur punën herët këtë të shtunë, ndërkohë që një ditë më parë paralajmëroi se do të ishte në zyrën e tij kur të mbahej protesta.
Dje, mbështetësit e ish-kryeministrit Sali Berisha dështuan sërish për t’u futur në selinë e PD-së. Në një konferencë për mediat, ish-kryeministri deklaroi se dyert e selisë do të hapen dhe do tu kthehet demokratëve. Berisha tha se blindimet nuk mund të pengojnë dot vullnetin e demokratëve, teksa shtoi se çdo blind do të ngarkohet me kamion dhe do të niset tek shtëpia e kreut demokrat Lulzim Basha.
Ish-kryeministri paralajmëroi se personat që ndodhen në seli, të mos bëjnë mercenarin ose sipas tij do të përballen me pasoja shumë të rënda. “Nuk ka diskutim që dyert do të hapen në mënyrën më të vendosur, që selia do t’u rikthehet demokratëve.
Selia nuk ka blind apo beton që mund të pengojë demokratët shqiptarë, si njerëz të lirë të rikthejnë këtë ndërtesë nga burg që e ka shndërruar Edi Rama me pengun e tij Lul Brava. Çdo blind do të ngarkohet me një kamion, dhe do t’ja dërgojmë Bashës tek shtëpia tij dhe ti përdori për çfarë të dojë.
Se ku do të jetë peng Basha më 8 janar, është punë e tij. Një gjë është e sigurt, ne nuk futemi në ndërtesë për të dhunuar asnjë njeri, përveçse paralajmëroj mercenarët që është mirë të dalin nga ndërtesa.
Kemi informacione dhe i ftoj ata t’i nxjerrin nga selia, të shkojnë në shtëpitë e tyre mos të bëjnë mercenarin, sepse do të përballen me pasoja shumë të rënda”, tha ai.
