Nga qyteti i Kukësit ku mbajti “Foltoren” e radhës, ish-kryeministri Berisha kërcënoi sërish me protesta kundër qeverisë. Berisha duket i vendosur për të çuar vendin drejt kaosit dhe destabilizimit.
Ai apeloi ndaj qytetarëve që të bashkohen për rrëzimin e qeverisë, e cila sipas tij, është regjimi më i keq që nga koha e Enver Hoxhës. Përpara demokratëve kuksianë, Berisha tha se Edi Rama është përçarës kombëtar, dhe meriton të largohet nga pushteti.
“Nëse doni një Shqipëri sovrane dhe një forcë politike sovrane, të bashkohemi për të përmbysur regjimin më të keq që ka patur Shqipëria që nga Enver Hoxha dhe deri sot. Rrëzimi i Edi Ramës është imperativ, është një urdhër, një thirrje që buron nga zemrat e mbarë atdhetarëve shqiptarë. Kurrë ndonjëherë nuk ka patur në Tiranë një kryeministër që të urrejë me të gjithë qenien e tij veriun dhe Kosovën, siç është sot Edi Rama. Është një përçarës kombëtar, i cili ka në histori analog vetëm Enver Hoxhën”, deklaroi ai.
Më tej Berisha paralajmëroi Ramën se për shkak të rebelimit popullor, nuk do të mbyllë mandatin e tretë. “Edvin, ti mendon se do të gëzosh këtë mandat, dëgjoni pak ato daulle, po bien për ty. Mandatin nuk e gëzon dot ti, sepse ke vjedhur me qindra milionë, nuk e gëzon sepse vetëm në zonat e tërmetit ke përdorur 160 mln euro para në kontot për të blerë votat e njerëzve të varfër. Nuk gëzon mandatin, dëgjoji prapë ato daulle sepse ke përdorur patronazhistët, njëlloj si në kohën e baballarëve të tu mizorë për të terrorizuar shqiptarët”, u shpreh ai.
Berisha akuza SHBA-së
Berisha i mëshoi fort faktit se shpallja e tij “non grata” u bë pa asnjë provë, dhe se për bazë u mor vetëm lobimi i dyshes Rama-Soros. “Kurrë ndonjëherë në histori nuk është shpallur “non grata” një njeri i cili ka 8 vite që është larguar nga roli i udhëheqjes. Së dyti, kurrë ndonjëherë në histori nuk është shpallur një njeri për të cilin nuk ka ekzistuar kurrë asnjë akuzë, asnjë proces gjyqësor brenda apo jashtë vendit siç është Sali Berisha. Së treti, kurrë ndonjëherë nuk është shpallur “non grata” një njeri tre javë pasi forca e tij politike ka humbur zgjedhjet”, u shpreh ai.
Po ashtu, Berisha akuzoi indirekt amerikanët se po ndërhyjnë në punët e Shqipërisë. “Ne duhet të ringrihemi. Nuk do të realizojmë rritjen, në rast se nuk jemi sovranë, në rast se vendimet na i marrin të tjerët”, nënvizoi Berisha.
