Teksa 10 shtatori kur do mbahet seanca e parë plenare po afron, Berisha e ndarë mendjen se do të qëndrojë deputet dhe do të fusë PD në një konflikt të hapur me amerikanët. Ai ka dalë dje në një intervistë në “Euronews Albania”, ku i ka sfiduar hapur amerikanët dhe Bashën. Berisha e bëri të qartë se nuk ka ndërmend të heqë dorë nga mandati, dhe as të largohet nga grupi i PD-së.
Ish-kryeministri Sali Berisha është shprehur qartë se qëndrimi i tij në politikë do të vijojë përsa kohë i ‘Gjithëpushtetshmi’ t’i japë fuqi. I ftuar në emisionin “Now”, me Erla Mëhillin një natë më parë, Berisha tha se në të vërtetë nëse Partia Demokratike do të kishte fituar, ai do ta dorëzonte mandatin.
“Nëse PD-ja do t’i fitonte zgjedhjet… të them të vërtetën, unë do ta dorëzoja mandatin, nuk kisha më…Unë qëndroj në mbrojtje të interesave të saj, ndaj qeverisë dhe shoqërisë, tani PD-ja në qeveri, e kam thënë dhe e them prapë, unë kamzhik i opozitës në parlament nuk qëndroja, sepse nuk më takon ajo mua, kjo do të ndodhte.
Ju e keni parë që unë nuk bërë asnjë orë të vetme fushatë. Tani me këtë unë kam një “come back”, një rikthim. Sa të më japë i gjithëpushtetshmi fuqi unë do të vazhdoj tani. Gjatë kësaj kohe unë nuk kam bërë gjë tjetër veçse anti-komfrontizëm. Kam denoncuar kartelet e drogës dhe krimin e organizuar dhe do vazhdoj ta bëj. Absolutisht jo, nuk është paaftësia e udhëheqjes së PD-së. Më ka mbajtur në politikë, denoncimi i nëpërkëmbjes së interesit kombëtar, krimit të organizuar dhe korrupsionit”, tha Berisha.
Ish-kryeministri Sali Berisha duket se i trembet një vendimi kundër tij, dhe për këtë arsye ja bëri të qartë Lulzim Bashës se nuk duhet të guxojë të mbajë një qëndrim kundër tij.
“PD duhet të ketë fakte, dokumente dhe prova. Jashtë tyre PD qëndrim tjetër nuk mund të mbajë. Nëse ajo do gjendej para provave dhe fakteve, PD do bënte gabim historik nëse nuk merrte vendim për përjashtimin tim. Por nëse PD kërkon transparencë, ajo bën detyrën e saj. Unë padiskutim që do jem pjesë e grupit të PD”, tha ai.
I pyetur nëse Basha merr vendim kundër tij, ai tha: “Nëse ai e bën këtë, po heq dorë nga qëmtimi i të vërtetës. Nëse e merr të vërtetë atë që është thënë, ai delegon arsyen e tij dhe ky është problemi i tij. Njeriu i civilizuar që e ka të çmuar dinjitetin njerëzor, mendon së transparenca është ligji themelor”.
