Kreu i PD-së, Lulzim Basha, ka reaguar pas dorëzimit të firmave të delegatëve nga ana e ish-kryeministrit Sali Berisha, për mbledhjen e Kuvendit Kombëtar. Ai ka shprehur zhgënjimin ndaj ish-kryeministrit, duke thënë se është tallur me demokratët dhe fshehur blofin për mungesën e firmave për ¼ e anëtarëve të Kuvendit. Basha është i mendimit se nëse Berisha do ti kishte mbledhur firmat, do ti kishte dorëzuar sipas statutit.
“I zhgënjyer nga tallja që ka bërë me demokratët dje, duke fshehur blofin e tij dhe mungesën e firmave për ¼ e anëtarëve të Kuvendit, që do vinin në lëvizje mekanizmin për thirrjen e Kuvendit.
Nëse do ti kishte mbledhur, do t’i kishte dorëzuar sipas statutit. Në mënyrë që të nisnim procedurën statutore që e njeh shumë mirë dhe fakti që nuk e ka bërë, çdo demokrat e kupton pse nuk e ka bërë. E gjitha ka qenë një blof, e gjithë që nisi si një betejë gjoja për demokratizimin e PD-së përfundoi si një betejë për hallet e tij personale dhe pushtetin e tij personal”, tha Basha.
Mbledhja e Kuvendit Kombëtar është vendosur të mbahet më 11 dhjetor, sikurse ka bërë të ditur ish-kryeministri Sali Berisha gjatë “Foltoreve” të tij. Basha nuk e ka pranuar, dhe ka deklaruar se nuk do të ketë asnjë Kuvend që shqyrton vendimet amerikane, duke iu referuar vendimit të DASH për shpalljen e Berishës “non grata”.
