Në një prononcim për mediat nga selia blu, ish-kryeministri Sali Berisha ka zbuluar se protesta e 8 janarit do të jetë paqësore, dhe do të përdorën të gjitha mjetet teknike për të hyrë në godinë. Berisha sqaroi ndër të tjera se në protestë nuk do të ketë njerëz të armatosur.
Përplasje fizike?
Berisha: Se ku do të jetë peng Basha më 8 janar, është punë e tij. Një gjë është e sigurt, ne nuk futemi në ndërtesë për të dhunuar asnjë njeri, përveçse paralajmëroj mercenarët që është mirë të dalin nga ndërtesa.
Në çfarë ore nis protesta dhe kur do të përfundojë?
Berisha: Protesta nis nesër në orën 12:00, realizon qëllimet dhe ky revolucion paqësor nuk ndalet.
Por nëse nuk arrini ta nxjerrin zotin Basha, do të thotë që keni dështuar?
Berisha: Kush tha? Atë se thotë as ai vetë, ai e di që do të nxirret nesër. Ndaj bunkerit përdoren mjete teknike paqësore. Nuk do e gjuaj kush me mjete luftarake. Midis nesh nuk ka e nuk do të ketë kurrë njerëz të armatosur.
Nëse Basha refuzon të dalë nga zyra, si do e nxirrni?
Berisha: Me pekule, me pekule do e nxjerrim. Ju falenderoj për punën e shkëlqyer që keni bërë. Ka qenë rast unik për mediat, për të transmetuar skena turpi të imagjinuara.
Pas deklaratës për shtyp, ish-kryeministri Sali Berisha është ulur në kafenë përballë godinës bashkë me anëtarët e Komisionit të Rithemelit të PD, dhe drejtoreshën e Komunikimit Floriana Garo.
Berisha i është drejtuar kamarierit të lokalit me batutë, të mos u shërbejë mercenarëve të Bashës por vetëm demokratëve. “Mos u shërbe mercenarëve të Bashës. Ky lokal i shërben vetëm demokratëve”, është shprehur Berisha.
