SPAK ka kërkuar heqjen e mandatit të kryetarit të Partisë Republikane, deputetit Fatmir Mediu, i cili është nën hetim pas rihapjes së dosjes së Gërdecit dhe socialistit Alqi Bllako, i cili është hetuar për përfshirjen në çështjen e inceneratorëve. Me ketë levizje, i hapet rruga një arrestimi të mundshëm, bëjnë me dije burime të ‘Panorama’.
Ish ministri i Mbrojtjes dorëzoi më 1 nëntor rekursin në Gjykatën e Lartë ku kundërshtote vendimin e Apelit të GJKKO, që i hapi rrugë rihetimit dhe gjykimit të Mediut. Apeli i GJKKO, më 24 shtator mori vendimin për rikthimin për hetim në SPAK të dosjes, duke pranuar kështu kërkesën e prokurorisë dhe të familjes Durda. 13 vite pas tragjedisë, familjeve të viktimave iu rikthye shpresa se mund të marrin drejtësinë e munguar për familjarët e tyre.
Kujtojmë se SPAK tashmë ka rifilluar me pyetjen e dëshmitarëve, trashëgimtarëve të viktimave dhe personat e dëmtuar nga tragjedia. Pjese e ripyetjes do të jenë edhe ish zyrtaret e lartë në periudhën e tragjedisë me 15 mars 2008. Në shpërthimin e Gërdecit më 15 mars të 2008 humbën jetën 26 persona, e ndërsa u plagosën mbi 300 të tjerë.
Sakaq, në dhjetor të vitit 2021, deputeti i Partisë Socialiste Alqi Bllako iu përgjigj sulmeve në adresë të tij nga Lëvizja Socialiste për Integrim, në lidhje me inceneratorët. Të gjitha këto akuza, Bllako thotë se janë një hakmarrje personale e Monika Kryemadhit, kryetares së LSI-së, akuza që sipas tij janë të pabaza.
Alqi Bllako është një nga tre personat e kallëzuar nga SPAK, për aferën e inceneratorëve në akuzën e “shpërdorimit të detyrës” si edhe “shkelje të barazisë së pjesëmarrësve në tendera”.
