Ben Blushi ka dhënë dorëheqjen nga “Top Channel”, media e njohur të cilën e drejtonte prej katër vitesh. Nga sot ai nuk është më drejtori i Përgjithshëm i “Top Channel”, ndërsa ka njoftuar dorëheqjen me anë të një e-maili.
Në këtë mesazh që i është dërguar drejtuesve të Top-Medias, Ben Blushi njofton se po largohet nga kjo detyrë, dhe po le median e njohur shumë herë me të shëndetshme dhe më të besueshme seç e gjeti katër vite më parë.
“Duke nisur nga sot nuk do jem më në Top Channel. Me bindjen se sot po largohem nga një kompani më e shëndetshme, më e besueshme dhe më e madhe në krahasim me atë që gjeta para katër vitesh, ju uroj të gjithëve punë të mbarë. Ben Blushi”, shkruhet në e-mail.
Ben Blushi u vendos në krye të “Top Channel” para katër viteve. Lajmi në atë kohë u përcoll nga vetë presidentja e kompanisë, Vjollca Hoxha, në një komunikimin që ka bërë me drejtuesit e departamenteve të Top Channel. Si një gazetar, shkrimtar dhe politikan, Blushi ndihmoi “Top Channel” të hapë një cikël të ri komunikimi dhe informimi. Ende nuk dihet se kush do ta zëvendësojë Blushin në këtë detyrë.
