Bruce Willis është një nga aktorët më të mirënjohur të Hollivudit, me filmat hit si “Die Hard”, “Pulp Fiction”, “Armageddon” apo “Fifth Element”. Sot ai është shumë i famshëm, por jeta e tij nuk ka qenë përherë e lehtë. Një problem në të folurën e tij në fëmijëri, e bëri objekt të bullizmit në shkollë, ndërsa në një rast humbi pjesërisht dëgjimin gjatë xhirimit të një filmi aksion.
Lindi në Gjermani
Bruce Willis lindi në Idar-Oberstein të Gjermanisë Perëndimore më 19 mars 1955. I ati, David Willis, ishte një ushtar amerikan me mision në Gjermaninë Perëndimore. Atje u njoh me nënën e Bruce, Marlene, që ishte nga Kassel. Në vitin 1957, David u shkarkua nga ushtria, dhe familja u zhvendos më banim në New Jersey.
Belbëzonte në fëmijëri, ndaj ra pre e bullizmit
Willis ishte tip social dhe i hapur me të tjerët. Por kishte diçka që e mundonte. Ai belbëzonte shumë rëndë në moshë të re, nga mosha 9-17 vjeç. Për këtë arsye, aktori kujton se tallej shpesh në shkollë. Por belbëzimi i tij do të zhdukej gjatë kohës që luajti një rol me trupën amatore të teatrit në gjimnaz. Më vonë nisi seancat e gjata të rehabilitimit me një logoped.
Publikoi një album muzikor, që u bë hit në SHBA
Jo shumë njerëz e dinë se përveçse është aktor, Bruce Willis ka qenë edhe një këngëtar i suksesshëm. Në vitin 1987, ai publikoi albumin “Kthimi i Brunos”, nga shtëpia diskografike “Motown”. Kënga kryesore “Respect Yourself”, u rendit e pesta në hit-paradën amerikane. Pas albumit të parë, ai publikoi më vonë edhe të dytin, me këngë të rrymës R&B.
Humbi dëgjimin në njërin vesh, gjatë xhirimit të filmit aksion “Die Hard”
Bruce Willis u bë i njohur në mbarë botën, me personazhin e John Mclain në filmin me disa seri “Die Hard”. Nëse mund të keni vënë re gjatë intervistave, Willis ka prirjen të zgjasë kokën para dhe të pyesë shpesh “Çfarë?” atë që po e interviston. Dhe kjo gjë e ka një arsye. Gjatë xhirimit të filmit “Die Hard”, Willis pësoi humbje dëgjimi në masën 2/3 në veshin e tij të majtë.
Sot nuk është se nuk dëgjon fare, por nuk mund të dëgjojë mirë. Dëmtimi i dëgjimit u shkaktua nga një skenë kur ai qëllon me armë një nga anëtarët e bandës kriminale. Për të pasur një zhurmë sa më realiste të së shtënës, stafi ia modifikoi armën që të bënte më shumë zhurmë se sa zakonisht.
U martua me aktoren Demi Moore
Një nga çiftet e njohura të Hollivudit, ka qenë martesa midis Bruce Willis dhe Demi Moore. Ata u njohën në vitin 1987, në sheshxhirimin e filmit “Stakeout”. Çifti u martua më 27 nëntor 1987 në Las Vegas. Në dasmë këndoi artisti i njohur Little Richard. Fatkeqësisht, martesa mes Willis dhe Moore nuk zgjati shumë. Ata u divorcuan në vitin 1998.
Është aktori i parë si personazh në një videolojë kompjuterike
Videoloja “Apocalypse” në vitin 1998, ishte një mundësi unike për aktorin Bruce Willis. Ai ishte personazhi kryesor i saj. “Apocalypse”, ishte në fakt videoloja e parë, e pabazuar në një film ekzistues.
Luajti në filmin “The Sixth Sense”, pasi i kishte një borxh kompanisë “Disney”
Willis shkaktoi në një rast një debat të fortë me producentët, mbi një projekt tjetër filmik të “Disney”. Ai duhej të luante rolin kryesor në filmin “The Broadway Brawler” rreth sportit të hokejit. Willis u tërhoq në momentin e fundit, dhe kjo e futi në konflikt me kineastët. Në nerva e sipër ai u përlesh fizikisht me regjizorin dhe një pjesë të mirë të stafit. Pak kohë më vonë, si për të kërkuar ndjesë, Willis u shfaq në 2 filma të kompanisë dhe “The Sixth Sense” ishte njëri prej tyre.
TIRANA TODAY
