Rama e ka nisur mëngjesin e sotëm me disa fjalë të shenjta nga Kurani. “O besimtarë! Bëhuni të durueshëm dhe nxiteni njëri-tjetrin të jeni të tillë”, janë fjalët e shenjta që Rama ka shpërndarë në Facebook.
Ky mesazh vjen edhe si një këshillë për të gjithë qytetarët shqiptarë, të cilët po kalojnë një situatë jo të zakonshme, si pasojë e frikës së prekjes nga koronavirusi.
Po kështu, kryeministri ka treguar me anë të një videoje se sa shpejt ka vepruar Shqipëria në rang evropian, për ngadalësimin e përhapjes së koronavirusit. Në hartë tregohet se Shqipëria i ka mbyllur shkollat më datën 9 mars, vendim i marrë ky disa ditë para se ta merrnin vendet e tjera.
Shqipëria është në “shtetrrethim”. Qarkullimi i makinave është ndaluar në shumë qytete, veç rasteve të autorizuara si autoambulancat, automjetet që furnizojnë marketet me mallra apo edhe makinat e akredituara të gazetarëve.
Qytetarëve u është kërkuar që të qëndrojnë të mbyllur në shtëpi, dhe të shmangin vendet e populluara.
