Presidenti serb, Aleksandar Vuçiç, ka folur në lidhje me bisedimet e pranimit në BE, duke theksuar se çështja kryesore tani mbetet arritja e marrëveshjes për Kosovën.
Ai tha se ka pasur diskutime të mira me zyrtarë të Parlamentit Evropian për tema të rëndësishme, duke nisur nga Kosova dhe situata ekonomike në Serbi.
“Një zgjidhje kompromisi me Kosovën është diçka me të cilën kemi shumë probleme dhe nuk e dimë se si do të shkojnë gjërat në të ardhmen, por ne jemi gjithmonë të gatshëm për të eksploruar”, tha Vuçiç.
Sipas tij, Serbia e ka bërë punën e saj teksa shton se BE po bën një vlerësim politik për të vendosur me çfarë shpejtësie do hapen negociatat.
Më tej, presidenti serb sqaron se shteti i tij nuk do të shkojë në drejtim të Rusisë, pavarësisht marrëdhënieve të mira që kanë me këtë vend. Ai shton se Serbia tashmë është drejt rrugës për në Bashkimin Evropian.
