Ndaj familjarëve të cilët përfunduan në qiell të hapur nga tërmeti i 26 nëntorit, Bashkia e Tiranës ka miratuar qiranë 1 vjeçare me vlerën e tregut. Sot, Këshilli Bashkiak i Tiranës miratoi një sërë vendimesh të rëndësishme, që kanë të bëjnë me përballimin e situatës së krijuar. Po kështu edhe për pagesën e plotë të qirasë për një periudhë 1 vjeçare për rreth 1082 familje, banesat e të cilëve janë dëmtuar dhe janë bërë të pabanueshme.
Kryebashkiaku Veliaj theksoi se pagesa do bëhet e vlefshme edhe për muajin dhjetor. “Vendimi i dytë është ndoshta vendimi më i rëndësishëm që marrim sot. Për pagesën e plotë të qirasë, sipas vlerës së tregut për familjet që janë dëmtuar nga tërmeti i datës 26 nëntor 2019. Nuk është vetëm një vendim financiar, është edhe një vendim për thjeshtimin e procedurave se si këto familje duke nisur nga nesër, do aplikojnë për të marrë 100% qira, sipas vlerës të tregut”, u shpreh Veliaj.
Më tej, ai sqaroi se përfitojnë pagesën e plotë ato familje që i janë dëmtuar shtëpitë, dhe që nga akt konstatimet e hartuara nga Instituti i Ndërtimit, është arritur në konkluzionin për evakuimin e tyre nga këto banesa.
Vlera e pagesës, sipas vlerës së qirasë së tregut të lirë sipas strukturave përkatëse të apartamenteve, të jetë si më poshtë:
- Qiraja për strukturën e apartamentit për 1+1, 18 mijë lekë.
b. Qiraja për strukturën e apartamentit për 2+1, 220 mijë lekë.
c. Qiraja për strukturën e apartamentit për 3+1, 270 mijë lekë.
Ndërkohë që sipas vendimit, familjet që aplikojnë për përfitimin e pagesës së qirasë, duhet të depozitojnë pranë njësisë administrative ku kanë vendbanimin e tyre, dokumentacionin si më poshtë:
- Formularin e aplikimit, i cili gjendet pranë njësisë administrative, sipas formatit bashkëlidhur këtij vendimi;
b. Akt konstatimi i Institutit të Ndërtimit;
c. Certifikatë familjare;
d. Numrin e llogarisë bankare, ku do të derdhet pagesa e qirasë.
Aplikimi dhe dokumentacioni, dorëzohet pranë njësisë administrative përkatëse.
