Në fund të protestës, Basha nga selia blu tha se do të vijojnë betejën deri në fund me vendosmëri. Kryedemokrati deklaroi para mbështetësve se misioni i tyre është mision brezash, dhe se nuk ka për tu ndalur në misionin për zgjedhje të lira e të ndershme.
Basha u dërgoi një falenderim të përzemërt të gjithë qytetarëve që sfiduan motin dhe iu bashkuan protestës, ndërsa nënvizoi në fjalën e tij se nuk do të ulet për dialog me kryeministrin Edi Rama.
“Mirënjohje për të gjithë ata që iu bashkuan qytetarisë, nga të gjithë anët, Kukësi e Dibra, nga Hasi, Mati, nga Erseka, Elbasani, nga Lushja e Fieri, nga Berati e Librazhdi, dhe nga qytetet e Shqipërisë. Sot treguan se nuk ka forcë mbi tokë ta ndalë kauzen tonë për zgjedhje të lira e të ndershme.
Nuk lejojmë të bëjnë pazare me të keqen, e keqja duhet të iki, për një Shqipëri si gjithë Europa. Ndaj në një kohë kaq të shkurtër, në mbi 3 orë ku s’ka pushuar shiu i bekuar asnjë sekodë, në përfundim të kësaj proteste jemi më të qartë edhe më të bashkuar, për të sakrifikuar gjithçka për liri. Rama ik!
Le të jetë e sotmja mesazhi me të cilën do ta vazhdojmë këtë betejë, të vendosur deri në fund, të fortë, kurajozë, për të drejtën tonë, për liri, demokraci, për Shqipëri si gjithë Europa.
Ne do të vazhdojmë rrugën që kemi nisur, misioni është për të gjithë ata të djathtë e të majtë, që sot e kanë kuptuar se vetëm përmes bashkimit, mund ta gjejnë të ardhmen e tyre, dinjitetin e tyre. Ju ftoj ta përmbyllim këtë marshim, duke kënduar himnin tonë kombëtar!”, tha ai.
