Kryetari i Partisë Demokratike, Lulzim Basha, i ftuar në “Opinion”, ka përsëritur qëndrimin e tij për qeveri teknike dhe për zgjedhje të lira. Basha deklaroi se Shqipëria shpëton nëse Edi Rama largohet nga posti i Kryeministrit.
Ai ka shprehur mirënjohjen për qytetarët, të cilët e mbështesin, dhe se kjo mbështetje vjen si pasojë e kërkesës së tyre për një Shqipëri më të mirë.
Ata nuk ngrihen për Partinë Demokratike, sipas Bashës.
“Me lëvizjen e 7 majit në Kavajë kemi objektiv parimor zgjedhjet e lira dhe si instrument, qeverinë teknike. Do vazhdojmë deri sa të kemi zgjedhje të lira, nëpërmjet qeverisë teknike. Shpëtimi i Shqipërisë vjen nga largimi i Edi Ramës. Kjo betejë kërkon kurajë dhe përgjegjësi. U jam mirënjohës qytetarëve, pasi kemi qëndruar së bashku për Shqipërinë dhe jo për Partinë Demokratike. Edi Rama kërcënon nxënësit përmes policisë dhe Ministrisë së Arsimit, kjo është demokracia e Edi Ramës. Qëndrimi ynë për 18 qershorin është qëndrimi për zgjedhje të lira. Ky është një shtet i falimentuar i lidhur me drogën. E vetmja mënyrë që Edi Rama të qëndrojë në pushtet është të mbrojë mafien dhe drogën. Ne i mbrojmë votuesit. Nuk ka për të pasur zgjedhje me krim dhe drogë, Rama ka lidhur fatin me to. Edi Rama është e vetmja pengesë. Ai largoi 300.000 shqiptarë të cilët emigruan për një jetë më të mirë”, – u shpreh kryetari i Partisë Demokratike, Lulzim Basha.
