PS dhe PD kanë nisur punën intensive për zgjedhjet e ardhshme politike. Ndonëse na ndan gati një vit nga mbajtja e zgjedhjeve parlamentare, dy forcat politike prej disa ditësh kanë “ndezur motorët” për fushatën elektorale, duke zbritur në terren dhe zhvilluar takime me bazën dhe strukturat.
Basha po rikthen edhe të “larguarit” në PD. Një ditë më parë u bë me dije se ish-ministri i Jashtëm, Besnik Mustafaj do të jetë pjesë e komisionit të përzgjedhjes së kandidatëve, ku bashkë me të do jetë dhe Genc Ruli, i cili do të jetë kryetar në këtë komision. Fillimisht do të bëhet identifikimi dhe propozimi i kandidatëve, një anëtar do të ketë të drejtën e një propozimi, më pas do të bëhet verifikimi dhe seleksionimi nga KVK, (Komisioni i Vlerësimit të Kandidatëve). Më pas lista do t’i kalojë sërish anëtarësisë me parimin, 1 anëtar, 1 votë dhe hapi final do të jetë zyrtarizimi i listës dhe miratimi nga Këshilli Kombëtar i Partisë Demokratike.
Po kështu edhe PS ka zbritur në terren. Pas deputetëve, takime në çdo qark me strukturat e PS për dhënien e direktivave ka nisur edhe kryeministri Edi Rama. Kreu i qeverisë ka kërkuar nga vartësit e tij që të nisin takimet derë më derë me qytetarët.
