Kryedemokrati Basha u pyet sot nga gazetarët lidhur me kërkesën e PD-së që Prokuroria të nisë verifikimin për kryebashkiakun e ri të Vorës, Agim Kajmakun. Kreu i PD-së theksoi se kryeministri Edi Rama është në dijeni të historisë së Kajmakut në Greqi, por e vendosi atë në krye të Vorës. Ai tha se Agim Kajmaku është një person me precedentë penalë të hapur me drejtësinë greke.
“Fakti është që Agim Kajmaku është një person me precedentë penalë të hapur me drejtësinë greke, që ky është një fakt i ditur nga Edi Rama dhe ka zgjedhur të vazhdojë të kandidojë një person tjetër me precedent penalë. Sa të tjerë nga këta kryebashkiakë janë me precedentë penalë, dhe a nuk është kjo një provë tjetër se kriza ka një burim kriminalizimin e plotë të Edi Ramës?”, tha Basha.
Më tej Basha theksoi se PD do të shpalosë një platformë për zgjidhjen e krizës. “Do të shpalosim një plan kombëtar, për të mos humbur më shumë kohë duke mbyllur derën e Europës për Shqipërinë. Por për ti dhënë fund kësaj krize, për të nxjerrë kriminelët”, deklaroi ai, duke shtuar se largimi i kryeministrit Rama dhe zgjedhjet e lira janë të domosdoshme.
