Pas shfaqjes nëpër rrjete sociale të videos ku ministrat shqiptarë ishin duke darkuar në një nga restorantet më të shtrenjta në Dubai, pati shumë reagime, pasi në atë kohë Shqipëria po kalonte ditë përmbytjesh.
Ditën e sotme, lideri i opozitës Lulzim Basha ka postuar një video në llogarinë e tij në Facebook, me të cilën thotë se shqiptarët nuk po marrin asnjë lloj ndihme në këtë kohë krize ekonomike dhe shëndetësore.
Ai gjithashtu përmendi se ministrat e Ramës shkojnë hanë darka miliona dollarëshe, ndërkohë që vendi po përmbytej. “Ndërkohë që vendi është nën ujë, mijëra familje po kalojnë dimrin e dytë në çadra, shqiptarët janë pa asnjë ndihmë përballë krizës ekonomike dhe shëndetësore, ministrat e Ramës shtrohen për shtatë palë qejfe në restorantin më të shtrenjtë në Dubai. Ka ardhur koha për një qeveri që kujdeset për njerëzit, dhe jo këtë që e ka mendjen vetëm për veten e saj”, shkruan Basha.
