Ndonëse në 2 mars doli në tubimin para Presidencës, kryedemokrati Basha ishte mjaft i tërhequr, duke theksuar disa herë se është aty si qytetar dhe jo si politikan. Por sinjali më i fortë erdhi një ditë më parë, pasi PD dhe PS u ulën në tryezën e reformës zgjedhore.
Pavarësisht faktit se gjatë tubimit, presidenti u shpreh se reforma zgjedhore duhet të mbyllet brenda afatit të caktuar që është 15 marsi, duket se nuk mbështetet fort nga selia blu. Dakordësia mes PD-PS ka lënë në baltë kreun e shtetit, i cili në këto momente ka në krah vetëm LSI.
Përfaqësuesi i PS në tryezën e reformës zgjedhore, Damian Gjiknuri, foli mbi shtyrjen e afateve për miratimin e zgjedhores, duke deklaruar se qëllimi është që të arrihet në një marrëveshje në parim, pastaj ndryshimet mund të votohen edhe në prill. Gjatë një reagimi për media, ai shtoi se nga 2021 kur janë zgjedhjet e radhës, ka kohë të mjaftueshme duke shuar shpresat e opozitës për zgjedhje të parakohshme.
Nga ana tjetër, LSI dëshmoi se është në krah të presidentit Ilir Meta, duke dalë kundër shtyrjes së afateve për miratimin e zgjedhores. Përmes një postimi, Petrit Vasili tha se shtyrja e reformës zgjedhore do të thotë shkatërrim i marrëveshjes opozitë-mazhorancë, bllokimin e hapjes së negociatave me BE, si dhe atë të zgjidhjes politike.
