Ndryshe nga çfarë ka kërkuar kryeministri Rama për izolimin e të moshuarve, kreu i PD-së ka propozuar që ata të kenë një orar ku mund të dalin. Kreu i PD-së shprehet se të moshuarit duhet të kenë vëmendjen maksimale, ndërsa e vlerëson të drejtë kufizimin maksimal të orareve për daljen e tyre, por jo izolimin total.
Sipas tij, duhet marrë parasysh propozimi për një orar të caktuar, që mund t’u lejohet dalja vetëm të moshuarve. Ndërsa të moshuarit janë më të goditurit nga kjo krizë, Basha propozoi këtë model, ku tha se nuk ka arsye pse të mos shqyrtohet.
“Ata të jenë në qendër të vëmendjes. Tregon se të moshuarit janë më të goditur nga kjo krizë. Të kufizohet në maksimum lëvizjen e tyre.
Caktimi i një ore të veçantë për daljen e të moshuarve, ky është një model i cili nuk ka pse të mos shqyrtohet. Por e rëndësishme është që kjo moshë të ketë vëmendjen e duhur”, tha Basha.
Ndryshe nga Basha, kreu i qeverisë i mëshon fort faktit tek izolimi total i të moshuarve, grupi më vulnerabël ndaj kësaj sëmundje. Pak ditë më parë, Rama doli në terren, për monitoruar situatën dhe zbatimin e masave për ndalimin e koronavirusit. Teksa ka qenë në inspektim në disa dyqane, kryeministri ka debatuar me një të moshuar që kishte dalë në rrugë. Rama i ka bërë thirrje që të qëndrojë në shtëpi në këtë periudhë të vështirë, pasi mosha e tretë është më e rrezikuar.
