Pas takimit të mbajtur me kryeministrin e Kosovës, Avdullah Hoti, kryetari i PD-së Lulzim Basha ka takuar presidentin Hashim Thaçi. Ndryshe nga takimi me Hotin, kryedemokrati Basha ka vendosur ta heqë maskën. Thaçi dhe Basha thanë për mediat se temë e diskutimit të takimit kanë qenë zhvillimet e fundit në të dyja vendet.
“Kënaqësi të takoja mikun tim të vjetër…. diskutuam për ecurinë e dy vendeve. Çdo përvojë pozitive nga Shqipëria dhe e z. Basha është i rëndësishëm për ne si institucione. Këto përvoja i kanë diskutuar edhe në takim me kryeministrin Hoti dhe liderë të tjerë. Duhet të kemi një angazhim sa më të gjerë në vazhdim. Diskutuam edhe për dialogun midis Kosovës dhe Serbisë. Për ne është jetike të kemi një konsensus sa më të gjerë dhe angazhim të unitetit. Gjithmonë kontributi i Shqipërisë ka qenë i mirëseardhur”, tha Thaçi.
Ndër të tjera, Basha i shprehu mbështetjen Thaçit, sa i takon sfidave të fundit. “Është gjithmonë një kënaqësi të takohemi. Faleminderit për mundësinë për të shkëmbyer informacione mbi zhvillimet në Kosovë dhe Serbi. Kosova po përballet me sfida të mëdha…
Mbështes dialogun dhe Thaçin. Kam theksuar bindjen se bashkërendimi i ngushtë midis SHBA dhe BE ka qenë dhe mbetet një parakusht për suksesin e çdo inciative për stabilizim për të gjithë vendet e rajonit, në veçanti sa i përket dialogut. Shpreha mbështetjen totale timen dhe të PD, në veçanti për ata që kanë sakrifikuar për lirinë e Kosovës dhe që u duhet të sakrifikojnë në plan personat për të siguruar frytet e pavarësisë dhe të lirisë për të gjithë qytetarët e Kosovës. Në veçanti për presidentin Thaçi dhe të gjithë bashkëpunëtorët e tij”, tha Basha.
