Në këto orë të ethshme, e ku protestat janë kthyer në kryefjalë të ditës, Basha dhe Meta janë dakordësuar për një takim, i cili është mbajtur jashtë syrit të medias. Takimi për të cilën u pretendua se u mbajt i fshehtë, u zbulua brenda një kohe të shkurtër nga mediat, ku përflitet se të dy kanë biseduar për më shumë se një orë.
Për më shumë se një orë, ditën e djeshme, kryedemokrati Basha dhe presidenti Meta kanë diskutuar në kofidencialitet. Ndonëse nuk dihet qëllimi i takimit, si dhe çfarë është diskutuar, ky takim vjen në një kohë kur opozita paralajmëron protesta të tjera.
Lidhur me krizën politike, Meta ka bërë publik qëndrimin e tij duke deklaruar se është i gatshmëm të dorëzojë mandatin e presidentit, deri edhe të vetësakrifikohet për t’i shërbyer zgjidhjes së krizës, dhe shmangies së instalimit të një junte ushtarake.
Mbetet për t’u parë nëse në këtë takim janë marrë vendime të rëndësishme, ndërsa nga të dy nuk ka patur një reagim.
Nga ana tjetër, LSI ashtu si pjesa tjetër e opozitës ka ndezur motorët për zgjedhje të parakohshme, edhe pse mazhoranca e ka përjashtuar diçka të tillë. Kryetarja e LSI-së, Monika Kryemadhi, duke folur për gazetarët para mbledhjes me ish-deputetët, tha se janë njoftuar të gjitha strukturat, dhe Shqipëria shumë shpejt do të ketë zgjedhje të parakohshme.
