Si rrallë herë, kryedemokrati Basha është zotuar para të rinjve demokratë, në takimin online të organizuar për “Ditën e Rinisë”, se do të kufizojë mandatin e kryeministrit.
Basha tha se do e bëjë realitet një gjë të tillë në parlamentin e ardhshëm, ose me referendum. Sipas kryedemokratit, dy mandate janë mjaftueshëm për të dhënë kontribut. Ai tha se pas këtyre dy mandateve, çdo kush mund të japë kontribute të tjera nëse ka akoma për të dhënë. Por me rëndësi është që t’u hapet rruga të rinjve.
“Pse duhet të kemi pushtetarë të përjetshëm? Dy mandate janë të mjaftueshme për të dhënë kontribut të vlefshëm. Pas këtyre mandateve, çdo kush mund të japë kontribute të tjera nëse ka akoma për të dhënë.
Por duhet t’u hapet rrugë të rinjve. Zotohem se përmes parlamentit të ri ose me referendum, do të bëj realitet kufizimin e mandatit të kryeministrit.
Kini besim tek fuqia juaj. Kini besim se koha juaj ka ardhur. Ju jeni bijtë e atyre që mposhtët totalitarizmin më të egër të Evropës. Do të ndryshojmë të ardhmen e Shqipërisë. Ju jeni e ardhmja e këtij vendi”, u shpreh Basha.
