Sot dhe nesër pritet të zhvillohet në Serbi takimi i radhës për “Open Balkan” mes tre vendeve, Shqipërisë, Serbisë dhe Maqedonisë së Veriut. Menjëherë pas vizitës së tij në Glasgow në samitin për klimën, Rama do të jetë sot në Beograd.
Në takimin në fjalë nuk do të jetë Zoran Zaev, i cili dha dorëheqjen pak ditë më parë. Sakaq, në vend të tij do të jetë zv.kryeministri Nikolla Dimitrov.
Mediat në Serbi, duke iu referuar një deklarate të Vuçiç, bëjnë me dije se sot në Beograd do të ketë shumë biznesmenë të huaj që do të diskutojnë për këtë nismë.
“Ballkani i Hapur” është mbështetur nga Rama, Vuçiç dhe Zaev, por pas dorëheqjes së këtij të fundit nuk dihet se çfarë fati do ketë, pasi opozita në Maqedoninë e Veriut e ka kundërshtuar.
Një ditë më parë, Rama dhe Vuçiç u takuan në Skoci gjatë samitit për klimën dhe diskutimi i tyre lidhej me nismën e “Ballkanit të Hapur”, nëse duhej vijuar pa Zaev apo jo.
