Në një prononcim për mediat, kreu i Grupit Parlamentar të PS-së, Taulant Balla shprehu dëshirën për të vijuar me opozitën rrugën drejt anëtarësimit të plotë në BE. Ndryshe nga kryeministri Rama, i cili një ditë më parë nga Brukseli deklaroi se nuk e di kush është opozita, Balla tha se synojnë që procesin dhe reformat t’i plotësojnë bashkë. Ai theksoi se gjithçka synojnë është bashkëpunimi me opozitën shqiptare, pasi ky është një proces ku gjithë-përfshirja është thelbësore.
“Kërkon përgjegjësi nga ana e çdo deputeti. Ky proces përfundimtar duhet të përfundojnë me një përafrim të plotë të legjistacionit shqiptar. Mendoj që roli i Kuvendit është thelbësor. Gjithçka ne synojmë ta kryejmë në bashkëpunim me opozitën shqiptare, pasi ky është një proces ku gjithë-përfshirja është thelbësore.
Sakaq, gjatë ceremonisë së ngritjes së flamurit të BE-së përballë Kryeministrisë, Rama u shpreh se do ta donte dhe opozitën, por kjo e fundit vazhdon të jetë në një hendek. Për këtë madje pati edhe një kundërpërgjigje nga ana e ish-kryeministrit Berisha, duke shkruar në rrjetet sociale: “Mohimi është forma ekstreme e lepurit në bark. Frikës!”
Ndërkohë Balla theksoi se ftesa për opozitën që përfaqëson interesat e shqiptarëve është e sinqertë. “Konferenca e parë ndërqeveritare ka definicion të qartë. Unë nuk i heq asnjë pikë dhe asnjë presje nevojës që ka shprehur kryeministri sot, kur tha se duhet ta kemi opozitën. Flas për atë opozitë të përgjegjshme, nuk flas për një element të caktuar që i ka shpallur luftë aleatëve të Shqipërisë, ftesa është e sinqertë”.
