Vrasësit me pagesë dyshohet se kanë kryer atentatin e së shtunës në zonën e Astirit në Tiranë, ku mbetën të vdekur Erigers Mihasi dhe Armand Dumani. Ekspertët e Laboratorit të Kriminalistikës, kanë nisur ekspertimin balistik të armëve të gjetura në makinën e djegur në Thumanë.
Pista kryesore: e shkuara e dy viktimave
Objektiv i atentatit ka qenë 32-vjeçari Erigers Mihasi, i konsideruar nga policia me precedentë të theksuar kriminal. Pista kryesore është ajo e së kaluarës së dy viktimave, të cilët rezultojnë persona me të shkruar kriminale dhe të përfshirë në disa krime.
Ka dyshime që në vrasje është përdorur edhe një automjet tjetër, për ka larguar autorët nga Thumana, ku u gjet i djegur mjeti me targa të vjedhura. Policia ka shoqëruar disa persona, kryesisht lidhje të dy viktimave, por edhe persona që mund të kenë dijeni për krimin. Ndërkohë që dyshohet se ka pasur edhe persona të tjerë të përfshirë në rolin e vëzhguesve.
Plumbat kanë kapur fillimisht makinën në derën e dytë dhe më pas janë përqendruar në xhamin e derës së parë nga ana e pasagjerit ku ishte Armand Dumani, të cilat kanë qenë fatale për dy rinjtë. Makina e djegur në Thumanë rezulton të jetë vjedhur jashtë vendit, ashtu si edhe targat, të cilat rezultojnë se janë vjedhur në Tiranë gjatë muajit korrik. Kjo e bën grupin hetimor të dyshojë se atentati ka qenë përgatitur që në verë. Ndërsa automjeti mësohet se ishte vjedhur në Greqi.
Autorët kanë monitoruar lëvizjet e viktimave
Dyshohet se atentatorët kanë monitoruar lëvizjet e viktimave, dhe kanë shfrytëzuar kryqëzimin të unaza e Re në Astir për të qëlluar. Erigers Mihasi, 32 vjeç, i cili drejtonte makinën dhe pasagjer Armand Dumani 26 vjeç, ishin dy personat brenda automjetit “Audi” ndaj të cilëve u krye atentati. Në drejtim të tyre është qëlluar me 20 plumba. Pasi u qëllua me armë, “Audi” i dy të rinjve u përplas me një shtyllë. Pas kontrollit rezultoi se viktimat ishin të paarmatosur.
