Lidhur me shpërthimin në zyrën e kryetarit të Bashkisë Lushnjë, policia bën me dije se nga veprimet e para hetimore dyshohet se autor i kësaj ngjarje është ish-shoferi i kryetarit të Bashkisë, shtetasi G. S. Ky i fundit, pasi ka hedhur granatën, është larguar menjëherë nga ambientet e Bashkisë Lushnjë. Forca të shumta policie po krehin zonën, me qëllim kapjen dhe arrestimin e autorit.
Kryebashkiakut të Lushnjes Fatos Tushe, i është bërë atentat mëngjesin e sotëm, në ambientet e Bashkisë. Ai është plagosur nga një granatë që ka shpërthyer në zyrën e tij. Nga shpërthimi ka mbetur e plagosur edhe sekretarja e Bashkisë së Lushnjes. Kjo e fundit është në gjendje më të rëndë shëndetësore, dhe është nisur me urgjencë drejt Spitalit Ushtarak në Tiranë.
Njoftimi i policisë
Sot, rreth orës 09:00, në zyrën e Kryetarit të Bashkisë Lushnjë, dyshohet se është hedhur një granatë dore dhe për pasojë është dëmtuar Kryetari i Bashkisë shtetasi F. T. dhe sekretarja e Bashkisë, shtetasja E. Q., të cilët ndodhen në spitalin e Lushnjës, nën kujdesin e mjekëve.
Nga veprimet e para hetimore dyshohet se autor i kësaj ngjarjeje është ish-shoferi i Kryetarit të Bashkisë, shtetasi G. S., i cili pasi ka hedhur granatën është larguar menjëherë nga ambientet e Bashkisë Lushnjë.
Forca të shumta policie të Komisariatit të Policisë Lushnjë, të DVP Fier, Renea e FNSH e Fierit po krehin zonën, me qëllim kapjen dhe arrestimin e autorit.
Grupi i posaçëm hetimor, me Specialistë nga Departamenti i Policise Kriminale ne Policine e Shtetit dhe DVP Fier, nën drejtimin e Prokurorisë po punon për zbardhjen e plotë të ngjarjes.
Shpërthim i fuqishëm në Bashkinë e Lushnjes, plagoset kryebashkiaku
