Pak ditë më parë, Ardi Veliu shokoi mbarë opinionin publik, lidhur me publikimin e një video-je të marë nga rrjetet sociale të së ëmës së 15-vjeçarit të dhunuar. Drejtori i Policisë së Shtetit, Ardi Veliu, publikoi një video, në përgjigje të kritikave për dhunimin e minorenit nga uniformat blu. Por ai nuk ishte në dijeni se mamaja e djalit të mitur, ishte aktore dhe se këto skena ishin prapaskena, pra asgjë reale.
Duke iu referuar pamjeve të nënës së 15-vjeçarit me pistoletë në dorë, Veliu ngriti dyshime mbi edukimin e djalit, si dhe mosbindjen ndaj policisë.
Qëndrimi i tij publik shkaktoi reagime të shumta, si nga klasa politike e po ashtu edhe nga qytetarët. Por ndryshe nga çfarë raportohet për dashakeqësinë e Ardi Veliut, Artan Fuga ngre dyshime të tjera. Akademiku Artan Fuga, i ftuar në emisionin “Ditë e Re” në Rtv Ora, tha se është i bindur kur thotë se ky nuk është një gabim rasti.
Sipas Fugës, Drejtorit të Përgjithshëm të Policisë i kanë ofruar një kasetë apo video me foto. Ai hamendëson se nëse ja kanë ofruar vartësit, kanë dashur ta fusin në qorrsokak. Opsioni tjetër është për të zhvendosur vëmendjen nga Teatri.
“Nuk ka nevojë ta komentosh. Ajo që ndodhi atë ditë ku Drejtori i Përgjithshëm i Policisë u tregon në telefon imazhe të lëvizshme apo fikse deputetëve, duke thënë se ky djalë nuk ka sjellje të mirë për shkakun se nëna e tij paska dalë me një revole… Unë thashë si është e mundur që policia nuk shkon ta arrestojë atë nënën për armëmbajtje pa leje, dhe të mos bëjë përgjegjës djalin për nënën dhe as nënën për djalin, sepse jemi në një botë qytetare ku secili ka vetëm përgjegjësinë e vet individuale. Sa kohë që nuk është i përfshirë në krime me bazë familjare. Thashë si nuk e arreston, nuk është e mundur.
Në atë moment thashë; po bën një gabim për këtë arsye. E dyta, çfarë lidhje ka djali me nënën? Pastaj duke arsyetuar pak më shumë, arrita në përfundimin se ajo që ka ndodhur nuk është e rastit. Drejtorit të Përgjithshëm të Policisë, i kanë ofruar një kasetë apo video me foto. Nëse ja kanë ofruar vartësit, kanë dashur ta fusin në qorrsokak dhe ai ndoshta në momentin e fundit nuk ka ditur sesi të orientohet. Dhe përpara deputetëve, e ka humbur kontrollin dhe e ka thënë.
Por unë supozoj dhe një gjë tjetër që mundet që atë video apo foto, ta ketë publikuar që ta diskretitojë për një çështje të vogël, që ta zhvendosin vëmendjen nga Teatri. Ose dikush kërkon ta djegë por jo për arsyen e Teatrit, siç kërkon opozita dhe shoqëria civile, por për një gabim personal. Nuk është një gabim i rastit”.
