Ish-ministrja e Jashtme, Arta Dade e ftuar në emisionin ‘Provokacija’ ka komentuar aktualitetin politik, ndërsa ka deklaruar se kryeministri Rama duhet të largohet.
Dade tha se Rama i kishte propzuar një detyrë të re, por nuk u realizua, pasi duhet të mbante ambasadorët për interesat e vendit.
“Rama në këto dy vite nuk po qeveris, Rama është i kapur nga një klientelë, që ka qenë edhe më parë se të vijnë në pushtet, e kam thënë edhe më parë këtë në Parlament.
Një kryeministër që e ka të vështirë të menaxhojë ministrat, dhe ua drejton gishtin gjithnjë atyre, atëherë nuk di të bësh detyrën. Rama nuk mund t’i shpëtonin këto afera, kanabizimi apo tenderat e frikshme, siç ishte rasti i Unazës së Re, por edhe në koncesione në shëndetësi por edhe të tjera”, deklaroi Dade.
Ndërkohë, ajo shprehet se Rama duhet të largohet për dy arsye, për menaxhimin e keq të fondeve publike, dhe për perceptimin që publiku ka për të si të korruptuar.
“Jam e zhgënjyer që kam votuar Ramën, por jo e penduar. Unë mendoj se Rama duhet të ikë, nuk e them se e do opozita, sepse ata nuk kanë ende personalitet që t’u bashkohet pjesa gri e elektoratit, por Rama duhet të largohet për menaxhimin e keq të fondeve publike, dhe për perceptimin që publiku ka për të si të korruptuar”, tha ish-ministrja.
