Policia e Shtetit njofton se ka arrestuar një 47-vjeçar në Vlorë, i cili ishte në kërkim ndërkombëtar. Ai kërkohej nga shteti grek për disa vepra penale. Sipas policisë, shtetasi me inicialet B.M. ishte në kërkim pasi akuzohet për vrasje, grabitje, armëmbatje pa leje, falsifikim dhe i përfshirë në trafikun e lëndëve narkotike.
Njoftimi i Policisë:
Finalizohet operacioni i koduar “Bianco”.
Kapet i kërkuari për disa vepra penale në shtetin grek.
Në zbatimin e planit të masave për kapjen e personave në kerkim, bazuar në informacione të marra në rrugë operative, Sektori i Hetimit te Krimeve, në bashkëpunim me Forcat Operacionale në DVP Vlorë, ka finalizuar operacionin “Bianco”, mbi bazën e të cilit është bërë kapja dhe ndalimi i shtetasit në kërkim:
- M. (L.), 47 vjeç, banues në Vlorë.
Ky shtetas ishte shpallur në kërkim në shtator të vitit 2019, pasi Prokuroria Vlorë ka dërguar urdhërin për ekzekutimin e vendimit penal nr.196, datë 06.08.2019 të Gjykatës së Rrethit Gjyqësor Vlorë, mbështetur edhe nga të dhënat e dërguara nga shteti grek dhe i ka vendosur masën e sigurisë “Arrest në burg”, për veprat penale:
“Vrasja me dashje, kryer në bashkëpunim”, “Grabitje në bashkëpunim”, “Armëmbajtje pa leje”, “Përdorim i paligjshëm i armës”, “Zotërim dhe transportim i një sasie të madhe të lëndëve narkotike” dhe “Falsifikimi”, të parashikuara sipas Kodit Penal të shtetit grek.
Materialet procedurale u referuan në Prokurorinë e Vlorës, për veprime të mëtejshme.
