Gjatë ditëve të fundit, ambasadorja amerikane Yuri Kim ka bërë disa vizita në Prokurorinë e Posaçme, dhe sipas burimeve po diskutohet për disa dosje tejet sensitive që do të kenë impakt publik kur të finalizohen. Në të njëjtën linjë ka qëndruar edhe gazetari Artan Hoxha, i cili ka hedhur dritë nga këto dosje, duke i mëshuar fort faktit se po planifikohet arrestimi i disa ish-ministrave dhe ish-kryeministrave.
Sipas tij, i rrezikuar është dhe Sali Berisha. “BKH sapo ka ardhur. Ka hetime dhe jam thirrur edhe unë për këtë gjë. Në pjesën që unë kam pasur dijeni, kam ndihmuar. Dhe e di që ka hetime. Në hetimet që kam parë është hetim që synon të godasë shumë lart. Por mund të arrestojë politikanë të rëndësishëm, ish-kryeministra dhe ish-ministra. Por edhe Berisha nuk është i përjashtuar nga kjo punë.
Por edhe këta që janë në detyrë, nuk janë të përjashtuar. Ambasadorja po mbulohet që të mbrojë dhe të dëshmojë se prokurorët janë në rrugën e duhur. Ka hetime dhe frika është që më mirë të mos arrestohet një politikan pa prova, se sa e arreston dhe pastaj del i pafajshëm.
Ambasada ka momente që e mbështet, se japin mbështetje financiare dhe me projekte, por nuk shkon dot me listë dhe t’u thotë arrestoni këta persona”, tha mes të tjerash Hoxha.
Sipas tij, pritshmëritë kanë qenë të shumta për SPAK, por arrestimi i tyre do kohë. Gazetari deklaroi në studion e “Abc News”, se do ketë zhvillime mjaft të bujshme.
Sakaq, ambasadorja amerikane Yuri Kim, i është përgjigjur ish-kryeministrit Sali Berisha. Në takimin në Fier, Berisha iu drejtua ambasadores duke i thënë se ka një dosje për të vetëm me shpifje.
Përmes një postimi në rrjetet sociale, diplomatja amerikane thekson se SHBA është serioze në çështjet e korrupsionit, në rastet kur liderët dhe zyrtarët e lartë janë të përfshirë. Yuri Kim thekson se Shtetet e Bashkuara mbështesin një Shqipëri më të fortë dhe demokratike.
“E mrekullueshme që në Uashington të koordinonim për hapat e ardhshëm në marrëdhëniet SHBA-Shqipëri.
Ne jemi seriozë sa i përket korrupsionit, duke përfshirë rastet kur liderët ose politikanë të lartë të vendeve të caktuara përfshihen në çështje korrupsioni masiv. Ndërkohë, mbështesim një Shqipëri më të fortë, më të begatë dhe demokratike seç ka qenë 30 vitet e fundit. Ne do të vazhdojmë të jemi me ju për 30 vitet e ardhshme”, ka shkruar Kim.
