Duncan Norman, ambasadori britanik në Shqipëri mëngjesin e sotëm ka zbarkuar në selinë e PD-së, për një takim më kryedemokratin Lulzim Basha. Ky takim vjen menjëherë pas protestës së organizuar nga opozita, e cila ishte një formë marshimi mes shiut për rreth tre orë, duke “trokitu” në dyert e pesë institucioneve.
Nuk dihet arsyeja e këtij takimi, por mendohet se lidhet me situatën politike në vend. Në reagimet e tyre para protestës së opozitës, faktori ndërkombëtar teksa bëri thirrje për tubim paqësor e dënim të dhunës, u bëri apel palëve që të ulen në dialog për të gjetur një zgjidhje.
“Ne i bëjmë thirrje të gjitha palëve të hyjnë në dialog, e cila është mënyra e vetme në të cilën bllokimi i tanishëm mund të zgjidhet. Dhuna dhe retorika nuk janë përgjigja”- thuhej ndër të tjera në apelin e ambasadës britanike një ditë më parë.
Deklarata e plotë:
E drejta për të protestuar është një përbërës thelbësor i një demokracie të shëndetshme. Por protestat duhet të jenë paqësore.
Ne dënojmë dhunën që u zhvillua gjatë protestës së 11 majit që plagosi si policinë dhe protestuesit dhe shkaktoi dëme në pronë.
Ne u kërkojmë liderëve të opozitës të dënojnë dhunën dhe të sigurojnë që protestat që ata mbajnë janë paqësore dhe të mbahen në përputhje me ligjin.
Ne gjithashtu kërkojmë që policia të tregojë përmbajtje dhe të respektojë sundimin e ligjit që ata mbështesin. Ne dënojmë me gjithë zemër frikësimin e ambasadorit të OSBE-së dhe dëmet e shkaktuara në qëndrimin e tij zyrtar. Nuk ka vend për një veprim të tillë në një demokraci moderne.
Ne i bëjmë thirrje të gjitha palëve të hyjnë në dialog, e cila është mënyra e vetme në të cilën bllokimi i tanishëm mund të zgjidhet. Dhuna dhe retorika nuk janë përgjigja.
